Erandio, 2026ko martxoaren 2a – Erandioko Udalak urrats garrantzitsua eman du etxebizitzaren arloan, lonja eta lokal hutsak etxebizitza bihurtzea arautzen duen ordenantza hasiera batean aho batez onartuta (EAJ, EH Bildu, PSE, Elkarrekin Podemos eta PP).
Araudi berri honen helburua da udalerrian etxebizitza eskuratzeko dauden zailtasunak arintzen laguntzea; arazo hori bereziki gazteei eta familiei eragiten die, Erandion beren bizi-proiektuak garatzeko oztopoak baitituzte.
Ordenantzak lokalak etxebizitza bihurtzeko erabilera-aldaketa baimentzeko esparru juridiko eta teknikoa zehazten du, bete beharreko baldintzak eta eskakizunak ezarriz, baita izapidetzeko dagokion administrazio-prozedura ere.
Prestaketa-prozesuan hainbat eragileren parte-hartzea eta ekarpenak izan dira: finken administratzaileak, higiezinen arloko profesionalak, merkatariak, herritarrak, gizarte eta ekonomia eragileak, eta udaleko talde politikoak.
Neurriaren xedea bikoitza da: batetik, gaur egun azpiegiturarik gabe edo erabilerarik gabe dauden espazioak aprobetxatuz etxebizitza eskaintza handitzea; eta, bestetik, hiri-berroneratzea sustatzea, betiere baldintza tekniko-urbanistikoak eta interes komertzialaren babesa bermatuz.
Ekimen hau bat dator Erandio Lagunkoiaren Diagnostikoan jasotako proposamenetako batekin; izan ere, bertan azpimarratzen zen araudi urbanistikoa egokitu beharra zegoela lonjak etxebizitza bihurtzea ahalbidetzeko eta azpiegitura gutxi erabilitako espazioak aprobetxatzeko.
Aitziber Oliban alkateak adierazi duenez, udalerriak ezin du onartu lokal komertzial huts eta itxiak mantentzea, herritarrek beren bizi-proiektuak garatzeko etxebizitza-eskaintza nahikorik ez duten bitartean. Ildo horretan, ekimenak dagoeneko existitzen diren baliabideak aprobetxatzearen alde egiten du, gaur egungo arazo sozial nagusietako bati erantzuteko.
Alderdi guztien adostasunera eraman duten funtsezko hiru elementuak honako hauek dira: bihurketaren ondoriozko etxebizitzak udal-etxebizitza tasatuaren modalitatean babes publikoko araubidearen mende jartzea; erabilera-aldaketaren ondoriozko eraikigarritasun-gehikuntzari lotutako zuzkidura-karga kentzeko eskakizuna ezabatzea; eta lehendik zeuden lokalei buruzko berariazko arauketa txertatzea, baldin eta eraiki zirenetik jarduerarik izan ez badute.
Ordenantza honen bidez, Erandioko Udalak indarreko araudia gaur egungo errealitatera egokitzen du, interes orokorra eta udalerriaren etorkizuna ardatz hartuta