Erandio, 2026ko otsailaren 2a – Erandioko Udalak Zainduz programaren edizio berria abiarazi du, mendekotasun-egoeran edo arriskuan dauden pertsonen zaintzaile ez-profesionalei laguntza eskaintzeko familia-inguruneko arreta-zerbitzua. “Zaindu dezagun zaintzen gaituena” lelopean, Zainduz 2026k zaintzaileentzako prestakuntza, laguntza emozionala eta autozainketa indartzen ditu.
Zainduz programa mendekotasunari arreta emateko zerbitzua da familia-ingurunean, eta zaintzaileei laguntzea du helburu, zaintza- eta autozainketa-trebetasunak eskuratuz. Horretarako, prestakuntza, informazioa, orientazioa, laguntza psikologikoa eta elkarguneak uztartzen dituen laguntza-sare integrala eskaintzen da.
Ikastaroak (urtarrila – maiatza)
2026ko ikastaroen programazioa zaintzarako gaitasun praktikoak lantzera eta zaintzaileen ongizate emozionala hobetzea bideratuta dago.
Urtarriletik martxora, “Barreterapia: zaintzarako laguntza” ikastaroa eskainiko da, estresa murrizteko, aldartea hobetzeko eta osasun mentala indartzeko helburuarekin.
Apiriletik maiatzera, gaixotasun neurodegeneratiboei buruzko prestakuntza eskainiko da, Alzheimerra eta beste dementzia batzuk ardatz hartuta, zaintzaileei oinarrizko ezagutzak emateko eta zaintza egokiagoa errazteko.
Ikastaroak Altzaga eta Astrabuduan egingo dira, Gaztetxokoan eta Josu Murueta Kultur Etxean, ordutegi egokituetan.
Sentsibilizazio-jardunaldiak
Zainduz 2026k jardunaldi irekiak ere jasotzen ditu, mendekotasunari eta zaintzari buruzko gizarte-kontzientzia sustatzeko. Otsailean suizidioaren prebentzioari buruzko jardunaldia egingo da, eta maiatzean zaintzaileen eginkizunari eta eskubideei buruzkoa, tresna juridiko nagusiak aztertuz.
Hitzaldiak
Programaren barruan, hitzaldi puntualak eskainiko dira. Martxoan, zaintzailearen antsietatea eta depresioa landuko dira, eta ekainean, disfagia eta beste mendekotasun batzuetarako elikadura egokitua jorratuko da.
Laguntza psikologikoa eta aholkularitza
Horrez gain, programak honako zerbitzuak eskaintzen ditu:
- Auto-laguntza taldeak, elkarren arteko babesa eta estresaren arintzea sustatzeko.
- Taldeko arreta psikologikoa, gainkarga emozionala prebenitzeko.
- Banakako arreta psikologikoa, pertsona bakoitzaren beharretara egokituta.
- Informazioa, orientazioa eta aholkularitza, mendekotasunari, desgaitasunari eta baliabide sozialei buruz.
Erandioko Udalak nabarmendu du zaintzaileek gizartean betetzen duten funtsezko zeregina, eta programa honen bidez zaintzen dutenei zaintza eskaintzea lehentasunezko helburua dela azpimarratu du.
Informazio gehiago eta izen-ematea Gizarte Zerbitzuetan edo https://herrihezitzailea.erandio.eus/zainduz-nortzuk-eu/ webgunean eskuragarri daude.